graad 1 – 3

Dit is vir ons Grondslagfase Personeel ‘n groot voorreg om te kan deel wees van ons Grondslagfase leerders se ontwikkeling en groei! Hierdie jare, veral Graad 1, word gekenmerk as van die mees onvergeetlike jare in ‘n kind se lewe! Tydens hierdie fase word leerders vir die eerste keer blootgestel aan ‘n formele leeromgewing en dié tydperk word beskou as die mees kritiese periode in u kind se opvoeding.

Ons leerders se Grondslagfase jare word daagliks gevul met opwindende en belangrike transisies waar hulle begin om kardinale akademiese vaardighede te ontwikkel. ‘n Soliede fondasie vir akademie word vasgelê waarop elke leerder kan voortbou vir toekomstige leer. Dit is spesifiek gedurende hiérdie fase ongelooflik belangrik om elke leer-geleentheid aan te gryp tot voordeel van u kind. Ons beskou dit van kardinale belang om saam met ons Rooimierouers in elke Rooimier te belê om te verseker dat alle areas van ontwikkeling die nodige aandag geniet. Die rol wat ouers vul in hierdie belangrike tyd is van onskatbare waarde.

fondasie

Gedurende Graad 1, 2 en 3 werk ons onderwysers na doelbewuste uitkomste in ooreenstemming met die kurrikulum om leerders toe te rus met al die nodige vaardighede en kennis wat noodsaaklik is om toekomstige akademiese uitdagings aan te durf en gevolglik te presteer op skool. Vaslegging van lees, skryf, Wiskunde-vaardigheid, asook ander belangrike lewensvaardighede word bewerkstellig wat leerders in staat stel om onafhanklik te kan baat by leer en te kan sin maak van die wêreld rondom hulle. Suksesbelewing tydens die vormingsjare van skool verseker dat leerders selfversekerd die leerproses kan aanpak en sodoende kan floreer op skool.